Davao City – ‘Generational change’ ang nahitabo sa piniliay karong tuiga human napildi sa bagohan kun neophyte nga mga kandidato ang mga karaan ug tradisyunal nga mga politiko nga dugay nang naghari sa ilang mga lugar.
Ang pagkaparot sa mga Estrada ug Ejercito sa San Juan, Manila, Pasig City, ug sa Del Rosario ug Floirendo sa Davao Del Norte ug daghan pang uban maoy niputol sa ugat sa pipila ka political dynasty sa nasud karon.
Giharian sa pamilyang Del Rosario ug Floirendo ang Davao Del Norte sulod na sa 40 ka tuig apan karon pulos sila gipangpildi sa mga pambato sa PDP-Laban.
Ang nakitang kalainan ug kausaban ni Prof. Ramon Casiple niining 2019 election mao nga ang mga tigulang na sa politika giharos og gipukan sa mga bag-ong salta sa piniliay.
Aduna na’y kinatibuk-an nga pag-usab sa perspektibo sa mga botante diha sa pagtratar ug pagboto sa mga milansad kinsa mga sakop sa political clan ila nang gisalikway ug gitalikdan.
Daku ang posibilidad nga nahimagta na ang katawhan sa matang sa pagdumala sa mga sakop sa political dynasties sa tagsa-tagsa nilang mga dapit apan walay kalamboan ang kinabuhi sa mga tawo.
Aminado si Casiple nga nagpabilin gihapon ang dunot nga sistema sa politika karon tungod kay napildi man ang usa ka dinastiya sa pamilya, ang midaog malagmit mga sakop ra gihapon sa political dynasty.
Hinoon, mas daghan og mahimo ang mga baguhan ikumpara sa mga nanigulang na sa politika karong sila ang mas giboto sa kinabag-ang duot sa katawhan.
Kini nagpasabot nga wala na mahaylo sa kwarta ug pagka-inila sa mga kandidato ang mga botante inay mas gitan-aw nila ang kaayohan nga ilang mahimo alang sa kaugmaon sa ilang mga pamilya ug mga anak.
Realidad nga dinhi sa Pilipinas, dili gayod mahanaw ug mabungkag ang mga political dynasties gumikan na usab sa mga balaud nga pabor kanila ug dili sa interes sa katawhan, sigun ni Casiple.
Busa anaa na karon sa kamot sa mga baguhan ang pagpamatuod sa ilang katakos sa pagpangalagad ug pagserbisyo maingon man sa pagpalambo ug pag-angat sa kinabuhi sa katawhan nga ilang gisaaran.
RadyoMaN Joel Viray
