Davao City – Kung gahi man og ulo ang mga trisikad ug pedicab drivers sa pagtuman sa balaud-trapiko nga dili sila pwede mubiyahe sa mga highways, walay laing mabasol niana mismo ra usab ang Local Government Unit (LGU).
Matud ni kanhi Inter-Agency Council for Traffic (I-ACT) Deputy Executive Elmer Organo, kamot nga puthaw ang gikinahanglan sa mga lokal nga opisyal aron mapatuman sa hingpit ang balaud-trapiko.
Matud ni Organo, kun mopatigbabaw na gani ang political interest ug kon mahadlok ang mga politiko nga makuhaan og boto, ang masakripisyo mao ang road safety resulta sa mga fatal road crashes.
Dugang ni Organo nga kamot nga puthaw ang gikinahanglan sa mga lokal nga opisyal aron mapatuman sa hingpit ang tricycle ban.
Gitindugan ni Organo nga wala magkulang ang Land Transportation Office (LTO) sa pagpatuman sa mga balaud apan tungod kay gamay ang mga personahe niini, dili gyod malukop og dakop ang mga masinupakon sa balaud.
Ang mga LGUs adunay pinakadakung tahas ug responsibilidad sa pag-implimentar sa transport regulations apan gumikan sa ilang political interest, ila na lamang gitugotan nga mabaliko ang balaud.
Gikontra ni Organo ang rason nga makulban og kaldero ang mga drivers kung did-an sila sa highway hinonoa, gihagit niini ang katawhan nga isalikway na ang ‘Third World mentality’ aron mo-asenso ang Pilipinas.
Gidasig ni Organo ang matag LGU nga mangita og alternatibong panginabuhian alang sa trisikad ug pedicab drivers aron dili na sila matintal og biyahe diha sa mga national highways diin hugot silang gidid-an.
RadyoMaN Joel Viray
