General Santos City–Andam na ang kapulisan sa Polomolok alang sa ipatumang seguridad sa tibuok munisipyo sa umaabot nga kalag-kalag sa Nobyembre 1 ug 2 kung asa gilauman ang pagdagsa sa mga tawo sa sementeryo aron mobisita sa ilang mga minahal sa kinabuhi nga mitaliwan na sa laing kalibutan.
Pagbutayag ni Police Lieutenant Colonel Marvin Dua-Dua ang hepe sa Polomolok PNP nga duna na silay security plan nga ginaandam alang sa kalag-kalag sa tanang pribado o sa publikong sementeryo sa Polomolok aron nga masiguro ang seguridad sa katawhan.
Daghan gayud matud pa nga magamit nga mga tawo sa maong okasyon nga maoy magbantay sa sulod ug sa gawas sa sementeryo aron dili malutsan sa mga dautang elemento nga buot mohimo ug kasamok.
Dugang pagbutyag ni Police Lieutenant Colonel Marvin Dua-Dua nga nakig-alayon sab sila sa uban pang mga force multifliers atol sa kalag-kalag nga motabang kanila sa pagbantay sa seguridad sa matag sementeryo.
Apil usab ang search and rescue sa ilang security plan gumikan kay dili lang sementeryo ang ilang bantayan sa adlaw sa minatay kundili apil na ang kadalanan sa posibleng dunay mga mahitabo nga aksidente nianang panahona.
Gipaklaro usab sa opisyal nga dunay mobile patrol nga nagalibot suroy sa mga kabalayan o subdivision aron nga mabantayan usab ang matag panimalay samtang anaa sila sa sementeryo.
Gipanghimangnuan usab ni Police Lieutenant Colonel Marvin Dua-Dua ang tanang moadto sa sementeryo nga likayan ang pagdala ug mga hait nga hinagiban, armas o bisan unsang mga butang nga ginabawal aron dili madelatar ang ilang pagsulod sa sementeryo.
Ginabawal usab ang kusog sa pagpatukar ug mga sonata sulod sa sementeryo ug ang pagpamaligya ug ilimnong makahubog ingon man ang sugal gani sumala pa sa opisyal nga tubig, pagkaon ug kandila lamang ang dad-on sulod sa sementeryo.
Gipaklaro ni Dua-Dua nga panahon nga dunay madakpan nga mga tawo nga nagdala-dala ug armas ingon man mga hait nga hinagiban pwede silang mapasakaan ug tukmang kaso. (Reynald Timario)
