Davao City – Karong May 13, 2019 hatagan og higayon ang katawhan sa ilang katungod sa pagboto ilawom sa pagpanguna sa Commission on Elections kun COMELEC.
Unsa ba ang mga elective positions karong 2019 Midterm Election?
Sa tibuok nasud, adunay 12 nga mapili sa pagka-Senador, 59 sa pagka Party-list Representatives, 239 nga members sa House of Representatives, 81 ka gobernador, 81 ka bise-gobernador, 778 ka member sa mga sangguniang panlalawigan, 145 ka city mayors, 1,489 municipal mayors, 1,489 ka municipal vice-mayors ug 13,542 ka member sa municipal/city council.
Suma total, adunay 18,060 seats nga pili-on mga botante karong adlaw sa eleksyon.
Nasayran nga subay sa general statistics o datos gikan sa COMELEC, adunay 61,842,728 ka mga rehistradong botante sa tibuok Pilipinas.
Anaa sa kapin 85 mil ka mga clustered precincts, kapin 189,000 ka established nga mga presinto, kapin 36 mil ka voting centers sa 17 regions, 81 provinces, 145 cities, 1,489 municipalities ug 42,045 barangays sa tibuok nasud.
Ilawom sa Local Government Code ug sa 1987 Philippine Constitution, ang tanang termino magsugod sa June 30, 2019 ug mahuman sa June 30, 2022, gawas lamang sa mga senador nga matapos ang termino sa June 30, 2025.
Pasabot nga pipila usab ka katuigan ang pagdumala sa mapiling mga opisyales diha sa gobyernong lokal ug nasyunal.
Rason kini nga daku ug kritikal gayud ang ensaktong pagpili ingon man ang pagbantay sa atong balota karong eleksyon aron saktong opisyales lamang ang mabutang sa pagdumala sa nagkadaiyang sanga sa atong panggobyerno.
Sa dihang mo-fill up kita sa atong balota, hinumdoman nato kini kanunay: Three years is a short time for a good servant, but three years is a long time for a corrupt public official – so let us vote wisely!
Labaw sa tanan, maayong legasiya ang mapabilin ug matagamtaman sa katawhan hangtud sa sunod pang henerasyon – kun husto ang atong pagpili sa mga opisyales sa gobyerno.
RadyoMaN Kirby Manzon
