Davao City – Dakung supak si Davao City First District Councilor Joanne Bonguyan-Quilos nga bunalan sa mga ginikanan ug sa mga magtutudlo ang mga bata diha sa pagdisiplina.
Ang bug-at nga rason ni Quilos kun nganong dili kini uyon nga pasakitan ang bata sa pagdisiplina mao ang epekto unya sa ‘psychological aspect’ sama sa violence nga matanum sa hunahuna sa bata.
Gihimong ehemplo sa konsehala ang iyang kaugalingon kinsa natarong ang iyang kinabuhi tungod sa matang sa disiplina sa iyang mga ginikanan diin bisan og kusi wala gayod kini makatilaw.
Wala gipadaplin sa konselaha ang kamahinungdanon sa pagdisiplina sa mga anak apan dili pinaagi sa pisikal nga silot inay sa pagpabati sa paghigugma ug pagmaymay ngadto kanila.
Dili usab maayo nga kanunay makadungog og pintas nga mga pulong ang mga bata panahon nga magdisiplina ug magbadlong kay mahimong ngil-ad ang ilang mga kinaiya inig kadaku.
Dugang pa sa last-termer nga konsehala sa unang distrito ning siyudad nga ang pagpanton sa anak gikinahanglan mupatigbabaw ang positibo ug dili paggamit sa bayolente nga porma.
Sakto lang ang gipanday nga balaudnon nga ‘Positive and Non-Violent Discipline of Children’ regulation aron mapanalipdan ang mga bata gikan sa abuso sa mga ginikanan ug sa ubang mga tawo.
RadyoMaN Joel Viray
