Davao City – Gi-awhag sa Parish Pastoral Council for Responsible Voting (PPCRV) ang mga botante nga dili isandig diha sa mga political advertisements ang ipakanaug nila nga boto sa mga kandidato nga nagpapili sa May 13, 2019 midterm election.
Sumala ni PPCRV Focal Person Henrieta De Villa, ang political ads angay himoong barometer aron mailhan ug masayran ang plataporma ug programa sa mga pulitiko kung kini may direkta bang benepisyo ug makatabang sa katawhang Pilipino.
Nakita ni De Villa ang importansiya sa political advertisements sanglit mao kini ang maghatag og dalan sa mga botante ilang matimbang-timbang kung kinsa ang ilang botaran sa eleksyon nga mahitabo karong adlaw’ng Lunes.
Pahimangno ni De Villa ngadto sa publiko nga sabton og maayo ang unod sa political ads sa mga kandidato: Kung kini pangdaut ba sa kontra o pasalig o promisa lamang nga kung sila makadaug, ang tanan nilang plataporma ila gayod buhaton.
Gidasig usab sa PPCRV Focal Person ang mga botante nga dili tugyanan sa ilang sagradong boto ang mga kandidato nga gi-una sa ilang kampanya ang pagguba sa iyang kaatbang ug kontra sa politika sama sa gihimo sa oposisyon ngadto sa mga kandidato sa administrasyon.
Gipahimangnoan ni De Villa ang mga botante nga bantayan ang ilang boto ug dili kini ibaligya ngadto sa tikasan nga mga pulitiko ug moboto segun sa konsensiya.
Ang matag boto mahinungdanon kayo sanglit mao man kini ang magdala sa pag-uswag sa nasud ug maghatud sa maayong kaugmaon sa tanan ingon man sa sunod pa nga mga henerasyon busa dili puwedeng magpaturagas ang katawhang Pilipino diha sa pagbotar.
RadyoMaN Joel Viray
