Davao City – Karon pang lang daan gipaniguro na sa Parish Pastoral Council For Responsible Voting (PPCRV) nga sila ang mahimong tunok sa mga kandidato nga masinupakon sa regulasyon sa kampanya subay sa balaud sa piniliay sa nasud.
Gipamahayag ni PPCRV Focal Person Henrieta De Villa nga ila nang gitan-aw sa unahan ang daghang kalapasang himoon sa mga kandidato sa palisiya sa kampanya nga nakalatid sa balaud sa piniliay nga gipatuman sa COMELEC.
Sumala ni De Villa, dugay na matud pa kini ginahimo sa mga politiko nga bisan pa og unsa ka hugot ang pa-himangno sa COMELEC mangita gayod og pamaagi ang mga kandidato aron mapromotar ang ilang mga kaugalingon bahala og maligsan ang reglamentos sa kampanya.
Matud ni De Villa, kabahin sa ilang bantayan mao ang kinatibuk-ang gastohon sa mga kandidato diha sa mga political advertisements, pagpahimo og mga tarpaulin ug mga posters, pagbayad sa ilang mga lideres ug uban pang bayolasyon nga ilang makumitar.
Hinoon, wala na nagbutyag si De Villa kung ila bang pasakaan og reklamo sa COMELEC ang mga politiko ug mga partido nga makasupak sa balaud sa eleksyon apan siguradong mahimong kalaban sa mga kandidato ang PPCRV karong piniliay gawas sa misanong sa balaud.
Segun ni De Villa nga gawas sa monitoring, maglusad usab ang PPCRV og voters education campaign sa mga botante aron ilang masabtan ang kasagrado ug kamahinungdanon sa ilang usa ka boto sanglit mao kini ang magdeterminar sa mamahimong kaugmaon sa ilang dapit ug sa ilang henerasyon.
Hilabi na nga walay kasigurohan kung dili ba ibaligya sa mga botante ang ilang boto ngadto sa mga kandidato nga mamalit og boto aron masiguro ang ilang kalampusan ug kadaugan sa eleksyon sa bulan sa Mayo karong tuiga, dugang ni De Villa.
RadyoMaN Joel Viray
