TACLOBAN CITY – Gin-uran hin reklamo an Professional Regulation Commission (PRC) Regional Office 8 tungod han paghalaba han pila han mga professionals nga nakuha hin lisensya, napa-renew o di ngani nag-aapply para han eksaminasyon.
Dida han byernes han nakalabay nga semana, umabot ha sobra 1,000 nga mga tawo an nakipag-transaksyon ha PRC kun diin an pila tikang ha opisina han PRC nga umabot ha kalsada han Senator Enaje St. Tacloban City.
Makikita gihapon ha mga litrato nga ginpadara han mga netizens ha RMN Tacloban nga nagtikang an ira pila alas 3:00 pala han kaagahon dida han byernes ha PRC.
Umabot gihapon mismo an reklamo ha PRC National Office ha Manila.
Pero sumala kan PRC Regional Director Narcival Randy Taquiqui, waray mamati hin instructions an mga propesyunal amu nga nagdamo an tawo ngan humalaba an pila.
“Pilit po namin lahat ina-accommodate yan basta lang makinig sila sa aming instructions, nagkakagulo lang kasi hindi sila nakikinig ng instructions. Gusto kasi nila lahat na mauna o number 1 sa pila.”
Ha eksplenasyon ni Director Taquiqui, an mga nagpa-online appointment dida han Dec. 26 holiday ngan 28, 2018 in pumila dida han byernes kun diin mayada liwat nagpa-appointment hito nga adlaw, sanglit an resulta, sobra nga humalaba an pila.
Mayada man daw liwat hira mobile services nga gin-ooffer ha mga probinsya kun diin an mga empleyado han PRC in napakadto ngan nahatag hin serbisyo pero ginpipili la daw gihapon han pipira nga magbuhat hin transaksyon ha PRC Regional Office ha Tacloban.
Nakadugang gihapon ha pagbugiot ha pila an mga nagfafile hin examinations sanglit pahimatngon ni Director Taquiqui.
“Sana po yung ugali sana natin kung kailan ang deadline sana po huwag na tayo pumunta don, mag-ahead tayo kasi November pa lang eh bukas na po ang sistema ng PRC.”
