Epektibo na ang preemptive lockdown sa bug-os nga probinsya sang South Cotabato matapos nga pirmahan ni Governor Reynaldo Tamayo Jr. kahapon nga adlaw ang Executive order no. 17 angot sa nasambit nga tikang sang provincial government batok coronavirus disease 2019 ukon COVID -19.
Suno kay Governor Tamayo napanahon na nga ipaidalom ang bug-os nga probinsya sang South Cotabato sa preemptive lockdown bisan wala pa sang kaso sang COVID-19 sa katuyuan nga maprotektahan kag magapabilin nga luwas ang mga pumuluyo batok sa nasambit nga balatian.
Ginpahayag man sang gobernador nga problema man ang testing kits kag wala man padalhan sang mga swab samples padulong sa laboratory sa Metro Manila tungod wala na sang flight sang eroplano.
Sa idalom sang preemptive lockdown ginadumilian ang pagsulod kag gwa sa probinsya kon indi man lang importante, apang exempted naman ang magdeliver sang suplay kag serbisyo.
Ginabawal naman ang pagpatigayon pa sang mass gatherings kag meetings, patuman ang curfew hour alas syete sang gab-i tubtob alas singko sang aga nga ang magbayolar ang arestuhon, ang mga mag-agi sa probinsya ang kinahanglan nga magpakita sang mga dokumento sa mga checkpoints, ipatuman sang public utility vehicles ang 50% loading capacity kag suspendido man ang operasyon sang tanan nga tourist destination sa South Cotabato kapareho seven falls sa Lake Sebu, Sports Complex kag South Cotabato Gym.
Samtang suno kay Governor Tamayo sa implementasyon sang preemptive lockdown may i-establisar nga checkpoints ang PNP sa mga exit points sang probinsya kag ang magbayolar ang may-yara sang nagakaigo nga pinalidad base sa balaud.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
