General Santos City–Dakong tabang alang sa mga konsumedor sa Socoteco II kung ugaling musugot ang kooperatiba sa hangyo sa syudad sa Gensan nga hatagan og discount ang mga member-consumers sa ilang bayrunon.
Kini ang gikanayon ni Asunsion Rodriguez- chairman sa General Santos City Consumers Welfare Council Incorporated atubangan sa nagpadayong enhance community quarantine tungod sa covid 19.
Sumala ni Rodriguez nga nakauyon sila sa nahimong lakang sa kagamhanan tungod gumikan na kining ikatabang sa katawhan nga karon naglisod tungod sa limitasyon.
Dugang pamahayag ni Rodriguez nga sa karon daghan gyud ang wala makatrabaho tungod sa preventive lockdown nga gipatuman sa gobyerno busa kinahanglan nila ang tabang sama niini.
Nasayran nga gawas sa paghatag diskwento sa mga bayrunon sa kuryente og tubig, gihangyo usab sa konseho sa Gensan nga ipaagi sa installment basis ang pagbayad matag bulan.
Matud ni Rodriguez ikalipay gyud og dako sa mga kunsumante kung kini himuon sa SOCOTECO ilabi na nga sa karon kulangon gyud ang mga food packs nga ginahatag sa gobyerno ngadto sa katawhan.
Kalabot niini giawhag usab ni GSC Consumers Welfare chairman Asuncion Rodriguez ang Gensan Water District nga tumanon ang panawagan sa mga konsehal sa Gensan.
Kahibaluan nga gawas sa SOCOTECO lakip nga gihangyo sa konseho ang water District sa Gensan nga muhatag og 30 porsyento nga discount sa mga konsumante.
Matud ni Rodriguez nga labihan ka importante alang sa katawhan ang tubig og gani alang kaniya mas importante pa kini kaysa pagkaon busa angayan nga ikonsidera sa water district ang resolusyon sa konseho.(Jordan Britos)
