General Santos City—Misutoy og saka ang presyo sa iligal nga droga nga shabu dinhi sa Rehiyon -12 kung asa subay sa report nga gipagula sa PDEA 12 misaka og kapin sa 200 porsyento ang presyo sa shabu sa Rehiyon. Kini human sa sunod sunod nga ginahimong operasyon sa mga “high-value target”.
Gibutyag ni PDEA-12 Regional Director Gil Castro, nga ang kanhing P300 pesos sa sachet sa pagkakaron mapalit na sa P1,000, indikasyon nga naapektuhan na og daku ang source ingon man ang distribusyon sa shabu sa rehiyon 12 tungod sa sunod sunod nga operasyon sa PDEA, PNP og AFP.
Samtang giklaru usab ni Castro nga walay pag usab sa mga presyo sa marijuana nga anaa pa sa P25 – P30 matag gramo.
Gikaingon pa ni Castro nga naka-alarma na sa pagkakaron ang maong presyo sa Marijuana tungod dali lamang makapalit ang mga estudyante gamit ang ilahang mga baon sa eskwelahan.
Sa pagkakaron nanawagan ang labaw sa PDEA 12 ngadto sa mga Purok og Barangay opisyal nga tabangan sila sa pagbantay og pagmonitor sa mga tawong nalambigit sa iligal nga droga. (Emir Bariquit)
