Bitbit ang mga placards, nag-piket gawas sa gate sa Salvador National High School sa Salvador, Lanao del Norte ang mga ginikanan sa mga estudyante sa maong tunghaan, aron ipanawagan ang pagpalagpot sa ilang principal nga si Marilou Apat.
Gi-reklamo nila ang mga kontribusyon nga moabot og kapin 500 pesos matag bata, sulod sa usa ka tuig, lakip na niini ang kontribusyon sa Parents-Teachers Association o PTA nga usa ka gatus ka pesos.
Dala ang placards nga dunay nakasulat nga “Apat Alis!”, “We Want Change”, “We Love SNHS, We Don’t Want Apat Anymore”, “Stop PTA Fee Collection”, “Principal Corrupts PTA Fee”, nag-tambay gawas sa gate sa tunghaan ang mga ginikanan aron hulaton ang pag-abot ni Apat.
Wala miabot ang principal niadtong adlawa.
Nasayran nga gawas sa 100 pesos nga PTA fee, nagkolekta usab ang tunghaan og 50 pesos nga school band fee, 90 alang sa school paper, 20 pesos alang sa Boys Scouts of the Philippines ug Girl Scouts of the Philippines ug 20 sa matag learning areas o subjects. Adunay walo ka learning areas.
Miingon si Ester Calunag, ang assistant principal, voluntary ang maong mga kontribusyon.
Apan mipalag ang mga ginikanan tungod kay dunay mga bata nga dili makaapil og periodical exam human dili pirmahan ang ilang clearance tungod kay dili makabayad.
Matud pa ni Noronsittie Umpa-Sabdullah, dili sila mo-undang hangtud nga dili mapapahawa sa ilang tunghaan ang principal.
Wala pa mihatag sa iyang side si Apat tungod kay makig-istorya una kini sa iyang Division Schools Superintendent.
Apan miingon si Armando Pasok, administrative officer sa Division of Lanao del Norte, ilang sutaon ang maong pangitabo. Ipaagi, matud pa, sa settlement kung ‘pamilya sa DepEd’ ang nalambigit, apan pormal nga reklamo ang ilang gusto madawat kung nalambigit ang mga ginikanan.
