Roxas City, Capiz- Isa-isa nga ginsabat sang principal nga si Mr Tomas Hupeda sang Inzo Arnaldo Village Integrated School ang mga ginahaboy nga reklamo kontra sa iya tagdumalahan.
Ginklaro sini nga nga wala madayon ang pagpatigayon sang JS Prom bangud man sa ginpananaog nga memorandum order ni DepEd Secretary Leonor Briones nga nagakanselar sang tanan nga mga aktibidades sang mga eskwelahan dala sang pamahog sang Novel Corona Virus.
Ginpunto ni Hupeda nga ang koleksyon sang 450 pesos, subject for approval ini bangud natalana pa kuntani nga ipatawag ang mga ginikanan.
Indi man ini sang mandatory bangud kun indi magsugot ang mga ginikanan, wala man sang may matabo nga JS Prom.
Samtang sa reklamo sa tuman ka mahal nga balayran sa pagpatigayon sang camping, ginpunto ni Hupeda nga ang tanan nga balayran ang may yara sang breakdown.
Ang koleksyon sang 800 pesos ang makit-an sa ginpadala nga sulat sa mga ginikanan lakip ang parents permit.
Ang 250 pesos nga balayran sa camp registration ang naalokar para sa maintainance sang venue nga patigayonan sang camp.
Ang nabilin amo ang gin-tunga sa lima ka pagkaon sang mga kabataan nga nagabalor sang tig-60 pesos per meal, 100 pesos para sa t-shirts kag transportation allowance balor 50 pesos.
Iya man nga ginpanindugan nga ang tagsa ka mga aktibidades nga ginapatigayon sang eskwelahan ang sanctioned sang Roxas City DepEd Division buot silingon indi sila maka-organize sang isa ka event nga indi sang aprobado sang DepEd.
Gintadlong man sini ang alegasyon sang tagreklamo angut sa ginapahayag nga “baluktot” niya nga pagdumalahan sa eskwelahan.
Agud nga masolusyonan ang problema sa paggutok sang mga estudyante kag kakulangan sang mga classrooms, ginpakamaayo sini nga ipatuman ang double shifting sa klase sa diin ini naman ang gin-aprobahan sang Roxas City DepEd Division.
Ini ang kabangdanan kun ngaa nangin half day na lamang ang klase sa Inzo Arnaldo Village Integrated School.
Iya nga ginpanindugan nga indi nila mabalibaran ang mga ginikanan kun ginpakamaayo sang mga ini nga sa IAVIS ipa-enroll ang ila mga kabataan bangud posible nakit-an man sang mga ini ang maayo nga sahe sang pagtuon-an. Nagasandig man siya sa tinutuyo sang DepEd nga mahatagan sang edukasyon ang tanan nga kabataan nga maka-eskwela.
Ginsabat man ni Hupeda ang akusasyon nga permi ini nagaligoy sa iya trabaho subong man ang iban nga mga manunudlo ang masami naga-eskapo kag nawili na sa paghampang sang mga mobile games sa cellphones(Mobile Legends).
Daw anu kasakit suno diri nga hambalon sila nga bulakbol. Iya man nga ginpanindugan nga kun siya ang bulakbol, wala ini ma-promote bilang isa ka principal.
Kun nagalakat man ini sa iban nga lugar para sa training indi ini makalakat kun wala sang travel order halin sa Roxas City DepEd Division.
