Gikumpirma ni Jail Warden Dominador Tagarda ang pag-ikyas sa usa ka piniriso sa Misamis Oriental Provincial Jail o MOPJ.
Matud ni MOPJ Warden Tagarda nga naila ang maong piniriso nga si Jhonrey Banggo taga Sihayon, Tagoloan, Misamis Oriental.
Dugang pa ni Warden Tagarda nga gidala ang suspek sa provincial hospital aron unta nga ipa check-up sa Hepa test tungod kay usa kini sa rekisitos sa in-house medication niini.
Apan pag-abot sa hospital wala ang doktor hinungdan nga mideretso ang tropa sa Palawan express duol sa usa ka mall kay adunay kuhaon nga kwarta.
Dako na lang ang kakurat sa gwardiya nga samtang kini nag-fill up wala na sa sakyanan ang suspek.
Samtang makagawas na unta ang suspek sa bulan sa Hunyo o Hulyo karong tuiga, tungod kay naka avail kini sa plea bargaining program.
Matud ni Tagarda nga tungod sa nahitabo kinahanglan nga mo-explain niini ang mga gwardiya nga nagdala kaniya.
Dugang pa ni Tagarda nga kung madakpan ang suspek mahimo kining isumbong sa evasion of sentence tungod kay gilayasan niini ang iyang sentensiya.
