Halos 2 ka semana molanat ang selebrasyon sa Sinulog matag tuig. Gikan sa mga religious activities hangtud na sa kalingawan siguradong malipayon ug madasigon ang tanang mga mosalmot sa lainlaing kalihokan. Karong tuiga, ania ang pipila sa mga dapat atangan sa mga deboto ni Sr. Sto. Niño ug apil na sa mga Sinulog Mardi Gras fans ug party-goers.
BASILICA MIÑORE ACTIVITIES
Karong Enero 11 buksan ang kapistahan sa balaang bata pinaagi sa usa ka religious activity nga mao ang “Walk With Jesus” gikan sa Fuente Osmeña padung sa basilica. Sundan ni sa installation sa Hermano ug Hermana Mayores. Unya sa basilica ipahigayon pud ang 9 ka adlaw nga halos inoras nga novena masses. Naa poy mga paghalad og sayaw gikan sa lainlaing performers gikan sa Sugbo ug bisan sa laing lugar.
PLAZA INDEPENCIA ACTIVITIES
Karong Enero 12 ipahigayon ang Opening and Launching Program sa mga kalingawan alang sa Sinulog sa Plaza Indepencia. Atol sa maong programa ipaila-ila sa publiko ang mga contestants sa Sinulog Festival Queen 2018, Sinulog Idol 2018 ug Sinulog Dance Crew 2018. Siguradong mapuno ang plaza sa mga buot maki-prititit ug makilingaw sa tanang presentasyon.
Unya magpadayon sab ang lainlaing mga cultural presentations ug variety shows hangtud na sa Enero 21. Atangi ang mga performers sa plaza sama ni Malaya Macaraeg of BAI TV (Enero 13), ang mga bandang Parokya Ni Edgar (Enero 21), 6 Cyclemind ug Banda Ni Kleggy (Enero 19), Coke Studio Artists (Enero 20) ug daghan pa. Dinhi pud buhaton ang grand finals sa Sinulog Idol inig ka Enero 20.
CEBU CITY SPORTS CENTER ACTIVITIES
Ipahigayon sa maong facility ang Sinulog Sa Kabataan Sa Lalawigan inig Enero 13 ug Sinulog Sa Barangay inig ka Enero 14. Ang coronation night sa Sinulog Festival Queen 2018 ug ang Sinulog Dance Crew Grand Showdown ipahigayon inig ka Enero 20. Ug ang Sinulog Grand Parade Kick Off apil na ang Finale ipahigayon gihapon didto inig ka Enero 21.
Pipila lang ni sa mga activities nga pagabuhaton alang sa Sinulog 2018. Para sa dugang detalye pwedeng mobisita sa Sinulog Foundation Inc. nga facebook page. Tinuod gyud nga grabe ang pagpangandam sa lainlaing sector sa atoang siyudad para sa kapistahan karong tuiga.
Sa asa man mo molaag nga mga lugar karong Enero idol? Sa basilica, plaza o sports center idol? Comment lang.
Pit Senyor, mga idol!
