Private school sa Matina, giimbestigahan ang bullying incident sulod sa campus

Davao City – Gipahibalo sa Ateneo de Davao University nga naglunsad na sila og imbestigasyon kalabot sa gikataho nga insidente sa bullying nga gikalambigitan sa mga estudyante sa ilang Junior High School (JHS).

Matud sa eskwelahan, gilayon nilang gitutokan ang kaluwasan sa estudyanteng biktima, gipahibalo ang mga ginikanan sa tanang nalambigit nga bata ug gihatagan og guidance ug counseling support ang apektadong estudyante.

Gipadayon na karon sa Child Protection Committee ang paghuman sa ilang imbestigasyon subay sa Student Handbook, Anti-Bullying Act of 2013 ug mga polisiya sa Department of Education (DepEd). Nakig-coordinate usab ang eskwelahan sa DepEd, ug ang mga mapamatud-ang responsable atubangon ang angay nga silot ug interbensyon subay sa due process.

Gihangyo usab sa tunghaan ang publiko ug media nga dili ipakaylap ang mga ngalan, hulagway kun bisan unsang detalye nga makaila sa mga menor de edad nga nalambigit aron malikayan ang dugang nga kadaot kanila. Nanghinaut ang eskwelahan nga mapalig-on pa ang mga lakang aron maseguro ang kaluwasan sa tanang estudyante.

RadyoMaN Kareen Beltran