Davao City – Gikumpirma karon sa Police Region Office (PRO) 11 nga dunay 16 ka pulis ang gipaubos karon sa person under investigation (PUI) ug person under monitoring (PUM) kun ‘suspect’ ubos sa bag-ong klasipikasyon sa COVID-19.
Matud ni PRO-XI Spokesperson Police Major Atty. Eudisan Gultiano, 14 ka pulis ang gikunsiderang PUI kun COVID-19 suspect ug duha ka pulis ang gipailawom sa monitoring.
Segun ni Gultiano, ang nasambit nga mga pulis nadestino sa managlahing lugar sa rehiyon ug naghome-quarantine na kansang padayon gimonitor ang ilang kondisyon sa Regional Home Service sa PRO-XI.
Gipasabot sa tigpamaba nga nakasinati matud pa og hinalat, ubo, sip-on, ug uban ang gikaasoy nga mga pulis hinungdan nga girekomendar ngadto kanila ang self-quarantine.
Gipalanog sa opisyal nga hangtud karon wala pa’y mga pulis dinhi sa rehiyon ang nagpositibo sa balatian bisan pa man og kadaghanan kanila nagpatuman sa COVID-19 checkpoint/chokepoint sa managlahing lugar sa Davao region.
RadyoMaN Joel Viray
