General Santos City— Nadawat na sa Police Regional Office 12 petisyon nga Writ Of Amparo sa pamilyang Bacudo human ang duha ka semana niining pagkawala. Sumala kang Police Senior Superintendent Johnson Almazan, Deputy Regional Director For Operations sa PRO 12 nga siya maoy gitahasan sa pagmugna sa Special Investigation Task Group kabot sa kaso ni Philip Bacudo.
Paniguro niya nga ilahang tumanon unsa man ang mando sa maong Writ Of Amparo kung asa aduna matud pay mga criteria nga gikinahanglan sa pagtubag sa maong petisyon.
Dugang pamahayag ni Col. Almazan nga lakip sa ilahang imbestigahan mao ang Police Station 4 human nga maoy gi-akusahan nga responsable sa pag-aresto sa nahisgutan.
Gihingusgan niini nga walay unsa mang cover-up nga mahitabo higayon nga mapamatud-an nga adunay kalabutan ang maong estasyon sa pagkawala sa nahisgutang batan-on.
Trabaho matud pa nila ang mag-imbestiga dili lang sa mga sibilyan kundili lakip na sa mga kaubanan nilang pulis higayon nga adunay salaud o kalapasan nga nahimo hilabi na kung kini pagpangabuso sa ilahang uniporme.
Kalabot niini, giangkon ni Col. Alamazan nga apektado ang tibuok kapulisan sa rehiyon sa gipagawas nga petisyon nga writ of amparo gumikan nag-una sa gimanduan kon subject niini mao si Police Chief Superintendent Cedrick Train, ang regional director sa PRO 12.
Pagpaklaro niya nga sila sa rehiyon 12 ang maghatag ug igong pagtagad sa Police Station 4 nga gika-ingong responsable sa pag-aresto ug pagkawala ni Philip Bacudo niadtong Nobyembre 10 sa may Mabuhay Road ning dakbayan.
Saysay pa niini nga gihatagan lang sila ug 72 ka oras aron sa pagtubag sa maong writ of amparo ingon man alang sa posibleng pagpagawas sa nahisgutang batan-on.
