General Santos City–Nagpahigayon ug lockdown ang Police Regional Office 12 sa ilahang kampo atol sa ilahang flag raising ceremony kagahapong adlawa aron nga surpresang e-check ang mga sakyanan sa tanan nilang personahe.
Sumala p ni Police Col. Bernard Tambaoan ang Deputy Regional Director For Administration sa PRO-12 nga ila kining gihimo dili lang sa PRO 12 kon dili lakip na sa mga City Police ug Provincial Police Offices sa Region 12, ingon man sa ubang parti sa nasud subay sa nahimong kamanduan ni Police General Archie Gamboa ang PNP Chief.
Dugang pa niini nga ang tumong sa maong aktibidadis nga masiguro nga rehistrado ug dili lakip sa mga ebidensya nga nasikop ang mga sakyanan nga ginagamit sa mga pulis sa ilahang paglakaw.
Nalipay usab si Col. Tambaoan nga sa kampo sa PRO 12 ginagmay lang nga mga problema ang ilahang nakita sama sa wala pa mabalhin ang mga rehistro sa ilahang napalit nga mga sakyanan ug wala pay mga plaka tungod bag-o pa nga napalit dili susama sa ubang lugar sa Pilipinas nga mas bug-at ang problema.
Samtang gipaabot pa ni Col. Tambaoan ang consolidated report sa mga city ug provincial offices sa PRO 12 ngadto sa ilaha aron sayron kung unsa ang nakit-ang problema sa lower units.(Dave Silagan)
