General Santos City–Nagmugna na ug Special Investigation Task Group (SITG) ang Police Regional Office-12 aron nga magpahigayon ug imbistigasyon sa nahitabong pag pamomba sa Isulan, Sultan Kudarat alas 7:00 sa buntag niadtong milabay nga Sabado kung diin gipangunahan kini ni Police Col. Oliver Enmodias ang Deputy Regional Director For Operation.
Sumala pa ni Police Lieutenant Lino Capillan ang tigpamaba sa Police Regional Office -12 nga sa karon padayon ang ginahimong imbistigasyon kabahin na sa maong pag busikad. Sa karon wala pay gipagawas nga resulta sa ilang imbistigasyon ang SITG.
Dugang pa niini nga sa kasamtangan anaa na sa 7 ka mga biktima ang nakagawas sa balay tambalanan samtang ang usa nalang ang nagpabilin sa hospital ug anaa na usab sa luwas nga kahimtang karong panahona.
Samtang gihingusgan ni Police Lt. Capillan nga wala siyay nakitang kakulangon sa gihimong siguridad sa kapulisan sa Isulan, Sultan Kudarat, sanglit gibuhat matud pa nila ang ilahang trabaho.
Nasayran nga human nakadawat ug impormasyon ang otoridad gikan kang Mayor Marites Pallasigue, gilayon man usab nila gipahugtan ang ilahang siguridad ug nag pahigayon dayon sila ug intelligence monitoring kauban ang kasundaluhan. (Dave Silagan)
