Mohimo ug imbistigasyon ang kapolisan sa Central Visayas labot sa shootout nga nahitabo tali sa kapolisan sa dakbayan sa Lapulapu ug grupo sa mga armadong lalaki nga niresulta sa pagkamatay sa pito ka tawo .
Gimanduan ni Police Regional Office-7 Director , Chief Supt. Debold Sinas ang Regional Investigation and Detective Management Division sa pagsusi kung wa bay nahimong mga kalapasan bisan tinood ug lehitimo kini nga operasyon .
Ang Regional Internal Affairs Service lakip usab sa mohimo ug imbistigasyon.
Una niini ang hepe sa kapolisan sa dakbayan sa Lapulapu nga si Sr. Supt. Limuel Obon nibutyag nga una silang gipamusil sa mga suspek dihang mopadung na sila sa nahimutangan sa mga armadong lalaki sa Sitio Michael Barangay Pajac , hinungdan nga napugos sila sa pagbawos.
Lakip sa napatay mao ang duha ka suspek sa pagpatay sa usa ka tinun-an sa Indiana Aerospace University nga si Kristian Saldavia, 19 anyos samtang nagkaon kini ug noodles kauban sa iyang higala .
Ang kapolisan nihimo ug anti drug ug follow-up operation sa sunod sunod nga patay sa dakbayan sa Lapulapu sa niaging mga adlaw nga niresulta sa pagkamatay sa 7 ka tawo.
