Davao City – Samtang pending pa ang Divorce Bill sa Kongreso, gipaningkamotan sa Integrated Gender and Development Division (IGDD) nga maduso sa city level ang Family Support Program.
Sa interbyu kang IGDD head Lorna Mandin, tumong sa maong programa nga pakusgon ug giyahan ang mga pamilya ilabi na kadtong nag-atubang sa dagkung problema ug suliran.
Gipasabot ni Mandin nga aduna silay pre-marriage counseling ginapahigayon apan human niini wala nay intervention kabahin sa mga problema sa kaminyoon gani ang tamang parenting.
“So kana atong giparopose mabutangan og pondo, mabutangan og tao, nag-storya na ta with CSSDO aron diha ta maningkamot,” sumala niini.
Dugang sa IGDD head, lakip sa Family Support Program ang Gender Action Plan sa matag barangay, Gender-Sensitivity for Couple ug Gender-Sensitivity for Men.
“Gina-strengthen pod nato nga ang lalaki mas dapat makasabot sa ilang obligasyon ug responsibilidad because parenting doesn’t come slowly on women’s shoulder,” pasabot niini.
Gani, awhag ni Mandin nga karong eleksyon suportahan kadtong mga mukandidato nga apil sa plataporma ang women empowerment ug pagpakusog sa mga programa alang sa mas lig-ong pamilya.
RadyoMaN Jason Amisola
