Davao City – Giklaro karon sa pamunuan sa Tagum City Police Office nga walay kalambigitan sa investment schemes ang nahitabong pagpamusil sa pipila ka dapit sa syudad sa Tagum sukwahi sa mga migawas nga balita nga ang hinungdan mao ang pagpanimalos batok sa mga nagpasiugda sa maong negosyo human kini sila gipasirad-an.
Sumala ni Police Lt. Col.Ariel Alcala, Tagum City Police Office Chief, ang sunod-sunod nga shooting incidents matawag gihapon nga ‘isolated cases’ ug padayon nilang gina-imbestigahan aron masayran ang ensaktong hinungdan niini.
Matud ni Alcala, wala silay nadawat nga report nga aduna pay usa ka gatos ka mga individual ang pamatyon butang nga ila usab kining gisusi.
Nanawagan karon sa katawhan sa Tagum ang maong opisyal nga gilayong isumbong ngadto kanila kung aduna silay mamatikdan nga dili maayo aron mahatagan gilayon ug aksyon.
Samtang gitataw usab sa hepe sa kapulisan sa Tagum nga wala silay nadawat nga report nga subling mibalik sa operasyon ang mga investment schemes sa ilang lugar human kini sila gipaundang subay sa mando mismo ni Pres. Rodrigo Duterte.
RadyoMaN Bernard Pantallon
