Davao City – Gi-awhag karon sa Police Regional Office (PRO-XI) ang publiko nga dili magpataka og pagpakaylap og mga balita o impormasyon kalabot sa mga krimen nga nagapanghitabo karon sa syudad sa Tagum.
Subay kini sa nahitabong sunod-sunod nga pagpamatay sa maong syudad diin upat na ang napatay sulod lamang sa usa ka semana.
Sumala ni Maj. Jason Baria, spokesperson sa PRO-XI, posibleng sakyan kini nga isyu sa mga tigsuporta sa illegal investment firms human nga gipaundang og operate ang kasagaran niini sa maong lugar aron usab motulak sa mga investment supporters nga molusad og rally.
Saysay ni Baria nga padayon pang gina-imbestigahan sa kapulisan ang maong mga insidente diin sagad sa mga kaso murder o homicide.
Kahinumdoman nga Hunyo 29, gipusil-patay si Danilo Roderos, usa ka ahente sa Everarm Marketing diin personal nga bangi ang gilantaw nga motibo sa Tagum PNP ug gisundan sa pagpusil-patay usab kang Reymond Faciol, kanhi camera man sa Davao Del Norte Provincial Information Office niadtong Hunyo 30.
Samtang niadtong Hulyo 1, gidunggab ang usa ka Teresa Mae Tero sa iyang uyab nga usaka LGBT human buot nang makipagbulag ang nahauna ngadto sa naulahi ug usab ang usaka Kim Galimba kinsa nahilakip sa Top 10 Drug Personality sa Davao del Norte diin personal nga bangi ang gilantaw nga motibo niini.
RadyoMaN Jason Amisola
