Laing dungog na usab ang naangkon sa Probinsya sa Bukidnon human naangkon sa probinsya ang Rice Achievers Award 2019.
Personal nga gitunol ni Department of Agriculture Region-10 Executive Director Carlene C. Collado, CPA ug OIC Center Director Maria Lydia Adviento Echavez ngadto kang Provincial Agriculturist Alson G. Quimba kauban si Asst. Provincial Agriculturist Jacqueline Lagamon ug Senior Agriculturist Ma. Lalith M. Turan ang mokabat ngadto sa kuatro (4) milyones ka pesos nga cheke isip ganti nga gipahigayon didto sa Veranda, Brgy. Casisang, Malaybalay City dili pa lamang dugay.
Ang Probinsya sa Bukidnon nahimo nang Hall of Famer human kini midawat sa ika-unom na nga higayon sa susamang award diin ang Bukidnon nahiapil sa Category A nga mokabat ngadto sa 25 mil ektarya pataas ang luna nga gitamnan ug humay.
Usa sa gibasihan sa maong award ang pagsaka sa tonelada sa ani sa mga mag-uuma sa probinsya nga gikan sa 4.52 tons yield per unit area sa tuig 2018, misaka kini ngadto sa 4.57 tons yield per unit area sa tuig 2019.
Lakip usab nga gibasihan ang mga programa ug inisyatiba sa probinsya aron matabangan ang mga mag-uuma nga mas mapalambo pa ang ani sa ilang mga kaumahan.
Dinhi sa Bukidnon, lakip nga inisyatiba ug programa sa Provincial Agriculture Office ang pagpanghatag ug mga gamit sa pagpanguma sama sa tractor, semilya sa humay ug pagpahigayon ug mga trainings ug seminar ngadto sa mga mag-uuma sa tagsa-tagsa ka mga LGU’s.
Ang Rice Achievers Award tinuig nga gipahigayon sa Department of Agriculture sa koordinasyon sa Agricultural Training Institute nga nag-ila sa mga rice industry achievers diin tumong niini nga madasig ang mga mag-uuma sa humay nga makahatag ug daghang ani aron makahatag ug hustong suplay sa bugas atong nasod.
