Miapela karon ang General Manager sa Cagayan de Oro water district nga si Rachel Beja ngadto sa mga konsehal sa pagpahunong sa plano niini nga ipa walay pulos ang kasabotan tali sa Metro Pacific Water Investments Corp. nga gipanag-iyahan ni Manny V. Pangilinan. Kini sa katarungan nga ang mga konsyomante ra gihapon ang maapektuhan niini.
Pinasubay kini sa lihok sa COWD nga mangita ug pamaagi aron siguraduhon ang sakto nga serbisyo ug kung mahimo mas monindot pa kini, rason kung nganong giimbitahan sa COWD ang Metro Pacific aron mag invest ug mohatag ug limpyong tubig sa syudad.
Kahinumduman nga ang Rio Verde Water Consortium Inc. nga mao ang naga supply sa tubig sa syudad ang matud pa niuyon na nga putlon ang dugay na niining kontrata sa COWD. Apan kini nga kaso ang anaa pa karon sa regional court ug wala pay desisiyon. Dugay na matud pa nga gustong putlon sa COWD ang ilang kontrata tali sa Rio Verde.
Dugang pa ni Beja nga gidawat nila ang katungod sa bisan kinsa mang gusto moadto sa korte ug walay mahimo ang COWD niini. Sa kasamtangan, dakung problema pa gihapon ang panubig sa pipila ka dapit sa CDO ug padayon nga nag antos ang mga konsyumante samtang gakahitabo ang tanang kagubot sa sistema sa panubig sa syudad.
Ikaw idol, kinsa ang imong tan-aw nga angay manubag niining atong problema sa panubig? Gisumhan ka naba sa kalangay sa aksyon sa atong mga ahensya sa palibot?
