Gipresenta sa Pulangui IV Hydro Electric Plant pinaagi ni Engr. Albert O. Antonio ang Plant Manager sa maong planta ngadto sa hawanan sa Sangguniang Panlalawigan ang ilang mga problema nga nasinati sa maong planta.
Matud pa ni Engr. Antonio nga nag-unang problema sa Pulangui IV Hydro Electric Plant nga nahimutang sa Maramag, Bukidnon mao ang siltation o pagkabanlas sa yuta bunga sa makusog nga ulan paingon sa reservoir sa maong planta.
Ang maong yuta nagikan usab sa nagkadagkong mga plantasyon sa atong probinsya nga gitamnan sa saging, pinya, mais, tubo ug daghan pang uban diin kung adunay kusog nga ulan, mabanlas niini ang yuta paingon sa Pulangui River ngadto sa ilang reservoir diin ang tubig mao ang ilang gigikanan sa pagpatuyok sa tulo ka turbine nga nagikan ang kuryente.
Dugang pa ni Engr. Antonio nga gikan sa pagkatukod niini adtong tuig 1985, ang kapasidad niini sa gidaghanun sa tubig nga masulod sa reservoir sa maong planta moabot ngadto sa 67 million cubic meters, apan sa kasamtangang tuig, gibana-bana na lamang nga 16.82 million cubic meters diin ang nakadaghan niini mao na ang mga yuta nga nabanlas. Ang pag-disiltation o pagkuha sa yuta sa maong reservoir gibana-bana matud pa ni Engr. Antonio nga mokabat ngadto sa 27 bilyones ka pesos.
