Mambusao, Capiz – Nahatagan na sang solusyon sang municipal government sang banwa sang Mambusao ang problema sa ginpatuman nga dry run para sa traffic scheme sa mga roving kag naga-terminal nga mga traysikol sa nasambitan nga banwa.
Sa interview, ginpahayag ni Mayor Leodegario Jun Labao nga sang nakaligad nga Enero 21, nagpatigayon sila sang consultative meeting kaupod ang mga operators kag drivers sang mga TODA sa banwa sang Mambusao.
Diri nahisugtan nga pwede na makalibot sa merkado ang mga naga-terminal nga traysikol apang ginabawalan lamang ang mga ini nga mag-pick up sang mga pasahero.
Pinaagi sini, nagapati ang alkalde nga mangin patas sa duha ka bahin ang amo nga sistema.
Sa madumdoman, nag-ani sang nagkatuhay nga reaksyon ang amo nga dry run kun sa diin ginbawalan ang mga naga-terminal nga traysikol nga makasulod sa sentro sang banwa. Sa baylo, sila gid lamang ang kutob sa tagsa nila ka mga terminal.
Ini naman ang nangin kabangdanan kun nga madamo sang mga pasahero ang nagreklamo bangud nga nahimo nga doble ang ila nga pamasahe kun sila ang magapadulong sa merkado.
