Nagsugod niadtong Lunes, Enero 20 nga mulungtad sa Pebrero 2, 2020 ang laing hugna sa bakuna o patak kontra polio.
Sa interview sa RMN Malaybalay ngadto kang Grace Lingcasan, ang health education and promotion officer sa City Health Office Malaybalay gibutyag niini nga 14 ka adlaw nila kining ipahigayon aron makab-ot ang target nila nga ihap sa mga bata mga mabakunahan.
Matud ni Lingcasan nga adunay mga fixed post nga mao ang mga health centers o barangay health station ug hospitals, kung asa mamahimong muadto ang mga ginikanan ug dad-on ang ilang mga anak aron mabakunahan kontra polio.
Sigun niini nga ang mga vaccinators makita usab sa pampublikong lugar sama sa terminal, mall, simbahan ug uban pa.
Target nila nga walay malaktawan nga bata.
Padayon usab ang apila sa CHO sa tanan nga makighiusa sa mao nga programa aron masulbad ang polio outbreak sa nasud.
Sa paglugway sa bakuna kontra polio, target sa DOH nga masakop ang 95 percent nga mga batang nag-edad 5 anyos paubos nga mahatagan sa oral vaccine.
