Dako nga perwisyo ang padayon nga gakasinatian sa mga konsumante sa tubig sa dakbayan sa Malaybalay human ang mga pagkawala sa linya niini sa milabayng mga adlaw.
Kini ang gibutyag ni Board Member ug Majority Floor Leader sa Sangguniang Panlalawigan sa Bukidnon nga si Nemisio Beltran Jr. atol sa interview sa RMN DXMB Malaybalay.
Sumala niya nga mipagawas na siya og resolusyon kabahin sa pagkonsidera sa pagbaligya sa Kibalabag Water System Supply System kung dili mahimong maupgrade o mamodernized tungod kay padayon nga nagahatag perwisyo sa katawhan.
Dugang niya nga nasayud na siya kung unsay hinungdan sa maong problema sa tubig tungod pipila na kahigayon nga gipatawag nila sa SP-Bukidnon ang mga hingtungdang ahensiya sa tubig maong miduso siya og resolusyon kabahin sa pagbaligya nalang sa maong water supply.
Gisulti usab niya nga napulo lang katuig ang tagal sa mga pipelines sa tubig maong padayon nga muperwisyo sa katawhan ug adunay mga pagkadaot.
Sigon pa ni Board Member Beltran nga ibaligya nalang ngadto sa Prime Water Malaybalay ang maong water system kung dili makaya nga imodernized sa dakbayan aron nga usa ra ka kompanya ang magkupot sa pagpadagan sa tubig sa dakbayan.
Maong panghinaut karon ni Board Member Beltran nga ikonsidera pagdako iyang rekomendasyon aron nga masolusyonan ang mga nasinatiang problema sa tubig sa dakbayan sa Malaybalay.
