RMN Laoag – Naruay dagiti nagatendar a supporters iti ‘Proclamation Rally’ ti grupo ti Pamilya Marcos iti umuna nga aldaw ti panagkampanya.
Naisayangkat daytoy iti sango mismo ti kapitolyo ti probinsia nga indauloan ni dati a Senador Ferdinand “Bongbong” Marcos, Jr., kaduana dagiti kandidato iti 21 a munisipio ken dua a siudad.
Kontrolado met ti Philippine National Police ti seguridad iti aglawlaw bayat ti nasao a rally kadua ti search and rescue team ti probinsiya a nakasagana a mangsaluad kadagiti agatendar.
Kabayatanna, saan a natuloy ni Sandro Marcos nga anak ni Bongbong a timmaray a Bise-Gobernador iti probinsia, sinukatan daytoy ni Mrs. Cecile Araneta-Marcos, asawa daydi bokal Mariano “Nonong” Marcos III a kandidato kuma iti nasao met laeng a posisyon.
Ti Ilocos Norte ket baluarte dagiti Marcos, addaman dagiti Pilipino a saan a mangayat kadaytoy a pamilya, ay-ayaten met daytoy ti kaaduan nga Ilokano.
Bernard Ver, RMN News
