Davao City-Gidayeg ni Brethren Evangelical School of Theology Founder and President Professor Dr. Ariel Coleto ang pag-angkon ni Pangulong Rodrigo Duterte sa limitasyon sa iyang kapasidad sa pagsulbad sa suliran sa droga sa pilipinas.
Gibatbat ni Professor Coleto, maayo nga panag-ingnan nga lider si Presidente Duterte gumikan kay wala gihilom niini ang iyang kakulangon sa pagtuldok sa problema sa droga sa nasud.
Nahibaluan, giangkon ni Pangulong Duterte nga dili niya kaya sa usa lang ka termino ang pagtapos sa droga tungod kay migamot na kini og maayo sa atong dapit.
Busa sigun sa Professor, ang suliran sa droga sa pilipinas sukad pa kini sa miaging mga administrasyon ug na-ungkat lamang kini gumikan kay bugtong si PRRD lang ang nangahas sa pagbangga sa mga sindikato.
Atol sa kampanya, gipanghambog ni Pangulong Rodrigo Duterte ngadto sa mga botante nga sulod lang sa unom ka bulan masulbad na ang problema sa droga apan sa dihang nakalingkod na kini sa Malacañang ug gisugdan ang kampanya mihapak kaniya ang kadako ug kalalom sa suliran sa kontrabandos.
Busa nangayo kini og lugway hangtud nga giangkon niini nga kuwang ang usa ka termino alang sa pagsulbad sa problema ug samot na nga daghan diay taga-gobyerno nagpaluyo ug protector sa sindikato sa droga.
Apan positibo ang lantaw ni Professor Dr.Ariel Coleto kinsa Napolcom national adviser sa rebelasyon sa pangulo basta ang mahinungdanon nga pursigido ug naninguha si PRRD nga tapuson ang ugat sa mga sindikato sa droga sa nasud.
Dugang ni Professor Coleto, ang kasamtangang istratihiya ug direksyon ni Pangulong Duterte kuwang pa kini aron hingpit mahipos ang sindikato sa droga ug maangkon ang kadaugan sa giyera.
Kung siya kuno ang pasultihon, duha ka dugang istratihiya ang iyang isugyot kang PRRD uban sa pagtoo nga epekto kini nga pamaagi aron mapukan ug mapuhag ang pundasyon sa mga sindikato sa droga.
Unang istratihiya, pakusgan ang education campaign aron mas masabtan pa sa katawhan ang mugnaon nga kadaot sa droga sa lawas ug sa kaugmaon sa kabatan-onan, pamilya, ug sa atong nasud.
Ikaduhang istratihiya, palig-onon ang moral spiritual values ug palapnagon kini sa mga ahensiya ubos sa hurisdiksyon sa kagamhanan kay ang labing gikinahanglan karon sa mga empleyado aron mahilikay sila sa droga mao ang Dios.
Kasamang Joel Viray
