Davao City – Gisugdan karong adlawa ang unang adlaw sa 1st Asian Conference on Drug Abuse Prevention and Recovery Program sa Tagum City.
Sumala ni International Youth Fellowship (IYF) Media Coordinator Joshua Cho kapin 5,000 ka mga delegado gikan sa nasud Korea, Japan, Africa, America ug uban pang Southeast Asian nga mga nasud ang nipartisipar niini nga aktibidad.
Matud ni Cho tumong niini nga aktibidad aron magkahiusa ang tanang mga anaa sa panggamhanan, awtoridad ug mga representante sa nagkadaiyang nasud sa kampanya kontra iligal nga droga nga maoy usa sa mga nag-unang concern sa nasud.
Adunay mga programa alang sa mga drug reformists nga itanyag kanila aron matabangan sila atol sa ilang rehabilitasyon.
Usa sa ilang mga programa sa ilang organisasyon aron malikay ang mga kabataan sa droga ang pagpaapil kanila sa mga pagbansay ug culture exchange programs.
Mokabat usab sa 300 ka mga representante sa PNP, AFP ug mga LGUs ang nitambong usab niini nga aktidad dinhi sa Tagum City lakip na si Philippine Councilor’s League Chairman Councilor Danilo Dayanghirang.
Segun ni Dayanghirang mapasalamot ang lokal nga panggamhanan sa inisyatibo usab sa mga pipila ka mga langyaw nga maghatag og kaayuhan sa mga lungsuranon ilabina niining kampanya sa atong gobyerno kontra sa iligal nga droga.
Sa pikas bahin gibutyag ni Davao del Norte Police Provincial Office Spokesperson PSI AJ Tirador kapin 2,000 ka mga kapulisan uban ang Task Force Tagum ang nipatuman og hugot nga seguridad para sa mga delegado.
RadyoMaN Aimee Guinita
