GIPASABOT sa Provincial Agriculture Office (PAgrO) ang nakahan-ay nga proseso sa pagkuha sa accreditation requirement alang sa mga plantasyon sa saging ug pinya nga nag-operate sulod sa probinsya sa Bukidnon, sa tinguha nga hingpit masunod ang gipanday nga lokal nga balaodnon sa Sangguniang Panlalawigan.
Ang nasangpit nga proseso mao ang mosunod: 1. Mobisita sa Provincial Agriculture Office alang sa gihan-ay nga mga rekisitos; 2. Isumite sa Provincial Agriculture Office ang mga gipangayong kinahanglanon alang sa review; 3. Mobayad sa Provincial Treasurer’s Office ug ₱2,000.00 alang sa Accreditation Fee; ug 4. Ang Provincial Agriculture Office mohimo sa pag-endorso sa mga nalikom nga mga rekisitos, lakip ang photocopy sa Accreditation Fee, ngadto sa Sangguniang Panlalawigan alang sa approval.
Ang akreditasyon sa mga plantasyon sa saging ug pinya kuhaon ka-usa matag tuig, subay sa napalabang nga ang Ordinansa Numero 2020-040R(26th SP), nga magpahamtang ug dugang silot batok sa Agricultural Firms sa saging ug pinya nga plantasyon nga wala magsunod sa accreditation requirement nga nalatid sa Ordinance No. 2010-04R(11th SP) nga giulohan: “An Ordinance requiring Agricultural Plantation (and Industrial) firms in the Province of Bukidnon to seek accreditation with the Sangguniang Panlalawigan and for the other purposes,” further amending for the purpose Section 6 thereof — pinitsahan Setyembre 15, 2020.
Base sa mosyon sa nangamahan sa maong Ordinansa nga napolo ka tuig na sukad nga napalabang ang Ordinansa nga nagmando sa mga plantasyon sa saging ug pinya nga mokuha ug akreditasyon diha sa SP, apan pipila lamang ka mga kompanya ang misunod dinhi. Tataw nga ang nasangpit nga balaodnong-lokal, wala mahatagan sa igong pagtagad sa wala makasunod niini bisan pa man sa gipakusgang pagpatuman niini sa Provincial Agriculture Office.
Sa record sa Provincial Agriculture Office as of August 2020, nasayran nga sa kinatibuk-ang trese (13) ka mga plantasyon sa saging ug pinya sa Bukidnon, siyam (9) lamang ang nakakuha sa accreditation sa SP. Ug niining bag-ong napalabang nga Ordinansa, kamulo pa usab nag-apod-apod sa kopya ang PAgrO ngadto sa nagkalain-laing kompanya sa saging ug pinya, ingon man sa Local Government Units sa Bukidnon, alang sa ilang kasayuran ug tukma nga aksyon.
Mahinumduman nga nalatid sa Section 6 sa nasangpit Ordinansa, ang si kinsa mang agricultural firm nga adunay negosyo sa Probinsya sa Bukidnon nga wala nagtuman sa gikinahanglang akreditasyon (mahimo) mabuhatan ug rekomendasyon sa SP: nga pagasuspendihon gikan sa paghimo ug negosyo dinhi sa probinsya, blacklisted ug/o ideklara nga persona non grata sa SP, o ba kaha irekomenda sa dili pag-renew o kanselahaon ang ilang Environmental Compliance Certificate (ECC). Isip dugang pahamtang, dugang silot nga multa kantidad ₱5,000.00 ug/o pagkapriso sa dili molapas usa (1) ka tuig, sa pagbuot sa korte, ang angayang ipahamtang sa wala magsunod niini.
