Report ni: Jennifer Palomo Debaja
Ginatos ka libo na naman nga residente sa Hong Kong ang nagmartsa halin Victoria Park padulong sa government house kahapon sang hapon, Hunyo 16, 2019.
Apisar ginsuspende na sang Hong Kong government ang tuyo nga pagpasar sang kontrobersyal nga Extradition Bill, daku nga rally ang ginahiwat agud pahalinon sa pwesto si Carrie Lam kag ang pagbasura sa nasambit nga bill.
Suksok ang itum nga panapton, puti nga ribbon kag bulak, naga simpatiya man ang mga raliyesta sa naghikog nga 35 anyos nga lalaki matapos naglumpat ini sa building sa Pacific Place kahapon Hunyo 15, 2019. Gina alegar natraumatized sa Extradion Bill ang lalaki rason naghikog ini.
Tuyo nga idosu sang gobyerno ang pagpasar sang extradition bill agud suno sa ila indi mangin hukmungan sang fugitives o kriminal ang Hong Kong kasunod sang murder case sa Taiwan. Apang may mga nagakabalaka nga gamiton ang bill agud i-target ang mga political oponents sang gobyerno.
Ngaa gina kondenar ang Extradition Bill?
Kon madayon ang pagpasar sang bill, pasugtan ang criminal extradition requests sang mga otoridad sa China ,Taiwan kag Macau nga sa mainland mangatubang sang hearing ang mga suspetsado o fugitives sa desisyon sang mga korte sa Hong Kong.
Apang may mga nagakabalaka nga gamiton ang laye agud i-target ang mga political oponents sang gobyerno.
Gina alegar pa sang oposisyon nga nagagamit ang mainland China sang torture, arbitrary detentions kag forced confessions sa mga suspetsado.
Sa una nga rally sang nagligad nga Domingo Hunyo 9, 2019 ginabanta masobra isa ka milyon ang nagpartisipar kag ginsundan sang maduguon nga rally sang Hunyo 12 rason nga ginsuspender ini sang Hunyo 15, 2019.
Nagalaum ang organizer sang rally nga lubos lubuson na ang pagbasura sang nasambit nga kontrobersyal bill matapos ginatos ka libo kahapon ang nagsuporta sa rally.
