South Cotabato–Sobling nanawagan ang mga opisyal sa South Cotabato ngadto sa mga Locally Stranded Individual kon LSI ug Returning OFW kon ROF nga sundon ang tanang health protocol dungan sa ilang pag-abot sa nagkadaiyang lungsod sa probinsya.
Kini ang panawagan ni South Cotabato Legal Officer Atty. Mamerto Cosep, dungan na usab sa padayong pagsaka sa ihap sa mga nagpositibo sa virus gumikan na usab sa pag-abot sa mga LSI ug ROF sa South Cotabato.
Matud ni Atty. Cosep nga ila nang ginahimo ang tanan aron nga matabangan ug maatiman ang mga nasangpit ug bugtong hangyo lang nila mao nga sundon ang tanang patakaran sama sa pagpailawom sa 14 days quarantine ug uban pa.
Dugang pagbutyag ni Atty. Cosep nga ilang ginapaningkamutan nga walay mahitabong local transmission sa South Cotabato.
Pahayag niini nga mas lisod alang sa LGU’s ang pagkontrola sa pagsaka sa ihap sa posibleng mataptan sa Coronavirus kung dunay local transmission.
Aminado ang opisyal nga adunay pipila ka mga ROF ug LSI nga wala gasunod sa protocol diin uban kanila nagasibat sa airport palang aron dili sila mapailawom sa 14 days quarantine samtang duna usab uban nga naka-home quarantine nga wala nagasunod sa guidelines sama nalang sa dili pakighimamat sa mga pamilya ug sa mga higala.
