Ginkansela sang Provincial Government sang South Cotabato ang pipila ka aktibidad sa selebrasyon sang National Arts Month subong nga bulan nga partisiparan sang mga estudyante kag mga manunudlo.
Suno kay OIC Provincial Tourism Officer Dinky Cagaanan ang nasambit nila nga tikang ang bilang pagtuman sa ginpapanaug nga memorandum 15 series of 2020 sang Department of Education nga pagpostponed sang national kag regional activities subong nga bulan sang Pebrero tungod sa paandam sang Coronavirus disease 2019 ukon COVID-19.
Lakip sa mga ginkansela nga aktibidad ang Flash Mob Show nga gintalana kahapon tubtob subong nga adlaw, Rondalla Workshop kag FolkDance Workshop nga natalana sa Pebrero 24-26, Cultural Awareness for Students kag Culmination Day sa Pebrero 26.
Apang ang T`nalak Legendary Designs Exhibit kag AST Drama Festival ang magapadayon tungod wala ini nalakip sa ginkansela nga aktibidad sa selebrasyon sang National Arts Month subong nga bulan.
