Magapatigayon sang pagsinapol ang Provincial Health Office sang South Cotabato sa Presidente sang Association of Barangay Captains, Sangguniang Kabataan President kag Department of Interior and Local Government ukon DILG Provincial Director agud nga pangayuon ang bulig sang mga ini sa kampanya kontra balatian nga dengue.
Padayon man suno pa ang pagpanghatag nila sang olyset net sa mga eskwelahan nga ibutang pa pag-umpisa sang Brigada Eskwela.
Suno kay Dr. Rogelio Aturdido Jr. Provincial Health Office sang South Cotabato, ini tungod indi na lahog-lahog ang kaso sang balatian nga dengue dire sa probinsya sa subong kag kinahanglan na nga maghulag sang katawhan.
Gin-ako niya man nga indi nila kaya nga tapnaun ang nasambit nga balatian nga wala sang bulig sang katawhan sa pagpanglimpyo sa ila nga palibot.
Nahibaluan nga nalakip ang South Cotabato sa bug-os nga pungsod nga naidentify nga hostspot sa nasambit nga balatian.
Sa subong base sa datos sang Provincial Epidemiology Surveillance Unit yara na sa 1,188 ang kaso sang dengue kag anum na ang patay sa probinsya halin Enero tubtob Marso 30 subong nga tuig.
Ang nasambit nga kaso ang mataas naman sang 146% kumparar sang nagligad nga tuig sa kapareho nga period.
Ginkumpirmar man ni Dr. Aturdido nga sa subong wala pa sang deklarasyon sang dengue outbreak sa probinsya kag ang banwa sang Tampakan nga ginabantayan nga nagasaka ang kaso kada semana ang nagnubo naman suno pa.
