Nabakunahan na sang first dose sang COVID-19 si Provincial Health Officer Dr. Rogelio Aturdido Jr. kag assistant provincial health officer Dr. Alah Baby Vingno, lakip na ang 38 ka mga personnel sang South Cotabato Integrated Provincial Health Office (IPHO).
Nahibaluan nga si Dr. Aturdido upod ang iban nga IPHO personnel ang makabaton kuntani san first dose sang vaccine sang gindownload ang 2,300 doses sang AstraZeneca vaccine sa South Cotabato sang Marso 22, apang nagdesisyon ini nga magpaiway agud nga hatagan ang prayoridad ang mga healthcare workers sang mga RHUs nga naglab-ot sa masobra 3,000.
Sanday Dr. Vingno kag Dr. Aturdido ang nabakunahan sang Sinovac vaccine.
Samtang yara sa 22 ka mga IPHO staff -personnel sa COVID lab nga naassign sa pagkuha sang swab samples kag drivers ang nabakunahan naman bag-o ang Holy Week break.
Nagalab-ot naman sa 50 ka mga personnel sang Provincial Disaster Risk Reduction and Management Office (PDRRMO) kag Arts, Culture, Tourism and Museum (ACTM) Development and Promotions Unit ang hatagan man sang bakuna.
Paklaro naman ni provincial immunization program coordinator Genesis Navales, nga ang mga staff lamang sang PDRRMO kag ACTM nga direkta nga imbolbado sa contact tracing, swabbing, kag transport sang returning OFWs kag locally stranded individuals ang makabaton sang COVID-19 vaccine.
Base sa datos sang April 4, kabug-usan nga 7,936 healthcare workers sa South Cotabato ang nabakunahan na sang COVID-19 vaccine.
