Andam na mudawat og pasyente ang provincial isolation facility sa probinsya sa Sarangani maoy muatiman sa mga adunay mild symptoms sa COVID-19 oras nga mudaghan ang ma-admit nga taga-Sarangani. Segun ni Doctor Arvin Alejandro, ang provincial health officer, gihimo nilang provincial isolation area ang pipila ka mga dakong lawak sulod sa gi-donar sa nasud China nga Region 12 Drug Rehabilitation Center sa may Kawas, Alabel.
Operational ang maong regional drug rehabilitation center gani ubay-ubay na nga PWUDs o person who use drugs ang nakahuman sa ilang outpatient rehabilitation.
Apan nakigsabot si Governor Steve Chiongbian Solon sa Department of Health nga magtagana og mga room alang sa maong katuyuan, ma-separar ang mga pasyente nga lalaki ug babae, lakip na ang para sa medical team nga maoy mag-atiman kanila, ug ang room kung adunay mag-positibo.
Naka-andam napud ang lawak sa Sarangani Provincial Hospital nga mahimong ikaduha nga isolation unit sa Sarangani Province. Apan kaluoy sa Ginoo, sa record sa Sarangani Provincial Health Office, wala nay na-admit nga PUI nga taga-Sarangani. Ug sa napulo (10) ka swab test nga gipadala, ang tanan ang puros nag-negatibo sa COVID-19.
Kagahapong adlawa, personal mismong gi-inspeksyon ni Governor Solon kauban sila Assistant Provincial Administrator for Operation Engineer Gerald Faciol ug Provincial Hospital Chief Doktora Aileen Brion kuyog usab si Doktora Imelda Quinones ang maong mga pasilidad panagana sa contingency plan.
Basi sa Executive Order No. 11 nga gipirmahan sa Gobernador, kadtong makasinati og mild symptoms ang pwedeng dal-on sa provincial isolation facility gawas sa gimuntar nga barangay ug municipal isolation area, samtang ang moderate ug severe symptoms ang i-refer kini sa kasabot sa probinsya nga Level 2 o Level 3 nga hospital.
Una ng nigahin og sobra Sais Milyones ka pesos (P6M+) ang Provincial Government sa Sarangani aron ma-plastar ang maong duha (2) kabuok provincial community isolation center simbako masudlan sa makamatay nga Coronavirus ang probinsya.
