South Cotabato—Gikatakdang ipahigayon ang Governor’s T’nalak Charity Ball karong umaabot nga Hulyo 17 sa The Farm nga nahimutang sa Carpenter Hill, Koronadal City.
Tumong sa maong programa aron nga makalikom ug P600,000.00 nga pundo alang sa mga eskolar sa lalawigan ubos sa Kabugwason Paglaum Scholarship ug Grant-in-Aid Program (KPSGIAP )
Sumala ni Tourism Officer Argie Ryan Asaria, ang focal person sa maong kalihukan, nga mukabat sa 400 ka mga tiket nagkantidad og P1,500.00 ang matag usa ang gi-imprinta ug ibaligya ngadto sa mga benefactors o patrons kansa buot musuporta sa programa alang sa mga kabus apan takus nga mga katawhan sa probinsya nga gusto nga makakuha ug modular / short term nga mga kurso o kolehiyo.
“Ang tema sa Charity Ball karong tuiga mao ang “Modernong Filipiniana ug patrons”, kung asa ang mga bisita giawhag sa pagsul-ob sa angay nga sinina alang sa maong aktibidad subay sa pahayag ni Tourism Officer Asaria.
Ang world-class vocal group nga The Company ug comedienne-singer nga si Kakai Bautista gikan sa Manila maoy nag-unang bisita samtang anaa usab ang mga in-house artists sa South Cotabato Chorale ug ang biyolin nga si Prince Norje Figueroa ang anaa usab aron mohatag ug lingaw sa mga tawong motambong sa maong Ball.
Nasayran nga ang KPSGIAP nagahatag ug scholarship program ngadto sa technical vocational course ug 4-year o 5-year college degree nga programa ngadto sa mga kwalipikadong estudyante. Samtang ang Grant-in-Aid Program dugang ayoda usab alang sa mga elementary pupils ug mga estudyante sa high school samtang naghatag usab sila ug scholarship alang sa Medicine ug Law degree.
Gibutyag sa Provincial Treasurer’s Office nga sa nakalabayng tuig, ang charity ball nakalikom ug P194,000.00 nga pundo alang sa KPSGIAP. (Jica Rose Parok-MSU Intern)
