Hugot nga ginakampanya sang Provincial Population Office sang South Cotabato ang pagplano sang pamilya ukon pagpatuman sang family planning sa subong nga panahon nga ginpalawig pa ang ginapatuman nga enhanced community quarantine tungod sa paandam sang coronavirus disease ukon COVID-19.
Advice sini sa mga mag-asawa nga ang ini nga panahon sang lockdown ang pabakudon pa gid ang pag-updanay sang mag-asawa kag bug-os nga pamilya, kadungan sini ang pagplastar sang tama nga pagplano sang pamilya.
May-angot sini, suno kay Provincial Population Officer Zenaida Duron nagacoordinate sila sa mga municipal kag barangay health office angot sa paghatag sang family planning services.
Ginaawhag niya man ang mag-asawa nga indi malipat nga ipabalo sa pinakamalapit nga health centers ukon BHERT hotlines kon nagakinahanglan sang Family Planning advice ukon commodities.
Ini matapos nga ginakabalak-an man ang posible pagtaas sang kaso sang unplanned pregnancy dire sa probinsya subong nga panahon tungod base suno pa sa datos sang Population Commission nga sa tion sang kalamidad nagasaka suno pa ang wala naplano nga pagbuntis.
