NAGPADAYON ang implementasyon sa Lokal nga Kagamhanang sa Bukidnon sa mga nakahan-ay nga proyektong-inprastraktura niining tuig 2020, kini basi sa nakuha nga report gikan sa Provincial Engineering.
Sa rehabilitasyon sa 5,505.657 kilometrong kadalanan sa barangay sa tibuok probinsya, migahin ang probinsya og 70 mil ka pesos matag kilometro sa kinatibuk-ang pundo nga 367,093,243.65 ka pesos isip ayuda sa mga barangay sa pag-mintenar aron mahatagan sa maayo og hapsay nga pagbiyahe/pag-agi ang katawhan nga gipundohan matag tuig.
Padayon nga pagmintenar sa provincial roads nga gigahinan niining tuiga sa kinatibuk-ang kantidad nga 87,338,919.28 ka pesos alang sa 605.968 kilometro nga gilangkuban sa disye-nueve ka lungsod og syudad.
Usab ang concreting/upgrading sa 17.281 kilometro nga provincial roads nga gilangkuban sa Manlamonay-Kibatang-San Antonio East Road (Don Carlos), Jct. (Manolo Fortich) Lingion Road, Jct. National Highway Colambogon-Dangawan Road (Maramag), Dagumbaan-Cusina Road (Talakag), Jct. Sayre Highway (Kisolon) Sumilao-Puntian Road, Jct. (Baungon-Salimbalan-Cepalco Dam) Calag Highway,Nangka-Cepalco Dam- Calag Highway road sa Libona og ang Kiokong-Dumalama-Magsaysay Road (Quezon) sa kinatibuk-ang kantidad nga 298,294,134.75 ka pesos sulod sa Conditional Matching Grant to Provinces (CMGP) 2019-2020 Projects.
Ning tuiga, migahin usab ang probinsya gikan sa panudlanan sa PDRRMD alang sa construction sa Flood Control Projects sa kantidad nga 30,965,939.97 ka pesos alang sa lungsod sa Baungon, Libona, Kibawe, Quezon, Don Carlos, Cabanglasan, Pangantucan, Kitaotao, Kibawe, Damulog og syudad sa Valencia.
Ang probinsya usab migahin sa dakong pundo alang Construction of Sports Complex, Quarters and Road Networking diha sa barangay Laguitas, syudad sa Malaybalay sa kantidad nga 441,609,165.34 ka pesos diin 43.0145 ka porsyento na ang nahuman niining panahona og gilaumang magamit na sa tuig 2022.
Sa mga gitukod nga mga eskwelahan o Provincial School Buildings ning tuiga 2020, adunay 39 ka units o 63 ka classrooms ang padayung gitukod sa kinatibuk-ang kantidad nga 63,200,000 ka pesos og adunay dugang pa nga 22 ka unit o 38 ka classroom nga pagatukoron sulod gihapon niining tuiga. Dugang niana, adunay 52 ka units o 79 ka classrooms ang natokud na sa nilabay nga duha ka tuig sa kinatibuk-ang kantidad nga 85,814,735.46 ka pesos.
Gawas niana, adunay 426 ka mga classrooms nga gi-repair sa kinatibuka-ng kantidad nga 20,200,000 ka pesos.
Kining nahisgutan nga mga proyektong-inprastraktura gilantaw nga makahatag og dugang kalambuan sa ekonomiya og edukasyon sa tanang katawhan sa Bukidnon.
