Kahamokan sa mga Pilipino, dili gajud mahimo para sa ila na way prutas sa ila kan-anan sa pag-abot nan bag-ong tuig, hilabi na mga prutas na lingin.
Sumaya sa iban, prutas na lingin an musimbolo sa kasaganaan ug amoy isab pampaswerte sa pagsuyod sa bag-o nga tuig. Kun diin, kinahanglan 12 ka klase na prutas an dapat an musuyod sa ila mga lamesa.
Pero, sa mga way ikapalit nan prutas, para sab sa ila dili na ini kinahanglan pa na makumpleto or worst, waya gajud prutas na mabutang basta lamang jauy mabutang na salohan sa pamilya.
Pero diin man nagsugod inin tradisyon ug tinuohan bahin sa ‘prutas pag bag-ong tuig’?. Basi sa amo pagtuki, an tradisyon na ini nagsugod pa gikan sa mga Chinese na mikanhi dire sa Pilipinas ug ini an gi-adopt nan mga Pinoy.
Sila an nagdaya nan iban sab na mga klase sa pampaswerte parehas nan: pagsukbot nan mga may ligngin na mga baro, pagbutang nan coins sa bulsa, ug iban pa.
Pero ini na an tinuohan na lisod na mawaya sa mga Pinoy. Sa iban sab, dili makompleto an pagsugat sa bag-ong tuig kun waya an mga ini na mga butang kay naanad na sila sa mga ini.
Parehas rasab sa mga pabuto, biskan uno ka-delikado ini, sige ra gihapon sila kay nagtuo sila na ini an pampawaya sa mga kamalasan ug bad elements. Sa iban sab, basta magsaba-saba lamang sa New Year pwede na ini pampawaya sa mga bad lucks.
Hinuon, waya may siguro dautan kun mutuo ta sa mga ing-ani na mga pampaswerte–parehas jaon mga prutas sa bag-ong tuig; kay gane sa siyentipiko na panghuna-huna, an prutas makatabang sa paglimpyo ug dugang nan mga nutrients sa ato lawas. Nabusog pa imo lawas ug apil usab pagbusog an imo panghuna-huna.
Waya may siguro dautan basta lamang dili lang pasobraan. Ug dili lamang makalimot sa angayan na himuon labina an pag ampo, kay ini na mga butang na gitawag pampaswerte ra mahimong dili matuman kon dili ibanan nan pag ampo sanan paningkamot . Hinuon, sa kinatibuk-an,an rason sa pag-andam o pagpreparar amu man an pagpasalamat sa kahitas-an sanan an pagkalipay na natapos nato an isa ka tuig na puno sa pakiglimbisog sanan paglahutay . Marajaw na pagsugat sa Bag-ong Tuig 2018! (RadyoMaN Winston Ensomo)
