PSA: National ID System gipangandaman

Davao City – Gina asikaso na sa Philippine Statistics Authority (PSA) ang mga gikinahanglan atol sa pagpatuman sa National ID system karong tuig 2020.

Kini mao ang gibutyag ni Randolph Anthony B. Gales, Provincial Statistics Officer sa Davao del Sur, atol sa pakighinabi sa RMN Davao kaniya diin matud pa gihinay-hinay na og pagpang-apod apod sa PSA Central Office ang mga registration kits sa tanang rehiyon ug una nang nagpilot testing ang Manila niadtong Setyembre 2019.

Matud niini nga una pa man ang bulan sa Hulyo karong tuiga duna silay ipagula nga public advisory.


Gipasabot ni Gales nga naga isyu pa gihapon og IDs ang uban pang ahensiya sa gobyerno ug nagkanayon nga ang National ID mamahimong valid sa bisan unsang ahensiya ug bisan kinsa – dunay trabaho man o wala ang makakuha niini.

“Naa man guy mga tawo nga walay ID kay dili employed o wala nahuman og eskwela. That’s the time na makakuha na sila og ID nila kay wala may pili na 100% ang registration,” segun niini.

Gawas sa ID system, gipangandaman usab sa PSA ang population census nga mahinayon sa tibuok bulan sa Mayo diin sa pinakaulahing census kaniadtong tuig 2015, anaa sa 1.6M ang populasyon sa Davao City.

RadyoMaN Jason Amisola

Facebook Comments