General Santos City— Nakatakdang magpahigayon ug meeting si Police Senior Superintendent Romeo Berango, OIC City Director sa GSCPO ngadto sa City Legal Officer ug City Permits ugmang adlawa mahitungod sa mando ni Mayor Ronnel Rivera nga ipasirado ang tanang outlet sa small town lottery sa dakbayan.
Sumala niya nga kinahanglang ipaagi ug saktong proseso ang maong lakang gumikan dili matud pa mamahimo nga kapulisan maoy manguna sa pagpasirado kundili ang city permits.
Kung asa igo lang matud pa sila sa paghatag ug assistance ngadto sa city permits. Pagpaklaro ni Col. Berango nga dili nila makonsiderang adunay illegal gambling nga nahimo ang pcso gumikan sila matud pa makasuhan sa ombudsman.
Usa matud pa sa ilahang hisgutan mao ang stratehiya nga himuon alang sa pagpasirado sa mga outlet. Gihingusgan man usab niya nga dili mamahimong dali-dalion ang maong implementasyon bisan ug ginapadali sa mayor ang operasyon batok small town lottery.
Gitubag man usab ni Col.Berango ang hagit ni Gensan City Councilor Jeng Gacal nga kung dili pa nila tumanon ang mando sa mayor, subli niya kining pasakaan ug kaso uban ang tanang mga chief of police.
Sumala kang Col. Berango nga dawaton niya ang unsa mang aksyon nga himuon sa konsehal, apan dili matud pa niya gusto ang ginahimong bahad sa konsehal.
Mas maayo matud pa himuon nalang sa konsehal ang ilahang trabaho isip magbabalaud ug sila sa kapulisan, ang maghimo usab sa ilahang trabaho.
