Posible nga ginabayluhan sang aswang ang duha ka bulan nga bata sa Barangay Cayos, Dumangas, Iloilo.
Ini ang pahayag sang Psychic expert nga si Master Allan Consing sang ginkaig-angutan sang RMN Iloilo.
Subong man, posible man suno kay Consing nga wala ginbayluhan sang taglugar ang bata kundi napatay lang sa kon anuman nga kabangdanan.
Ginpahayag ni Consing nga may mga kaso gid man nga nagakatabo ang pagbaylo sang taglugar sa mga tawo sa pihak sang advancement sa siyensya.
“May posibilidad. Daku ang posibilidad nga basi insakto man ang ila palatinhan siguro. Kay te indi ta man manegar kon kis-a nga diri sa ibabaw sang kalibutan bisan ano na ka abanse ang dalagan sang siyensya, may mga abnormal pa gid man nga mga bagay nga nagapakita,” ang pahayag ni psychic expert Allan Consing.
Panugyan ni Consing sa pamilya, kuhaan sang DNA sample ang bata kag kon magmatch sa DNA sang ginikanan nagapatimaan nga wala ini ginbayluhan kundi napatay gid lamang.
“Ang akon nga advise, you get the scientific side sina. Ipakuhaan DNA test ang lawas. Kon magmatch ang DNA sang bata sa iya ginikanan te daku ang posibilidad nga wala na ginkambyuhan.”
Nahibaluan nga ginhaboy sang iloy sa ila bintana ang lawas sang bata nga naputos sa comforter base sa ginhambal sa ila sang surwano agud mabal-an kon ginbayluhan gid man ini.
Apang daku ang ila kakibot sang magtupa sa duta ang comforter kag sang ginlantaw , wala na ang lawas sang bata kag sa baylo may nakita sila nga buhok sang kanding.
