Davao City – Giawhag sa Department of Health (DOH) ang publiko nga magpabakuna kontra COVID-19.
Sa eksklusibong interbyu sa RMN Davao kang Health Undersecretary Leopoldo Vega, giingon niini nga dili angay mahadlok ang publiko sa bakuna labaw na kung napamatud-an sa sa Food and Drug Administration nga luwas kining gamiton.
“Daghan man gud misinformation karon, daghan man gud ‘anti-vaxxers’. Para sa amoa sa health, kinahanglan na mabakunahan kay this is a way of preventing lalo na mga infectious sama sa COVID-19,’’ sumala ni Vega.
Gibutyag ni Vega nga magpadayon ang Emergency Use Authorization (EUA) sa Pfizer bisan pa man sa kapin 20 suspected deaths sa mga katiguwangan didto sa Norway nga adunay mga serious underlying health conditions.
Lauman nga sa Pebrero 20, 2021 muabot sa nasud ang 1ST batch bakuna sa Pfizer.
“Karon ganing February 20, muabotay na ang 1st batch nga gihatag sa (COVAX) facility, kanang vaccine gikan sa Pfizer ug muhatag dinhi sa Pilipinas. Mao nang unang i-roll out sa health workers o frontliners” sumala niini.
Gibutyag ni Vega dako usab og tabang nga mabalik ang kumpyansa sa publiko kung magpabakuna ang mga awtoridad lakip na si Presidente Rodrigo Duterte human nga dako ang nawalang confidence sa katawhan sa bakuna sukad pa sa Dengvaxia isyu.
RadyoMaN Aimee Guinita
