Davao City – Nagpahimangno si Davao City Mayor Sara Duterte-Carpio sa publiko nga likayan ang paghatag og kwarta sa mga indibidwal bugti ang bakuna o kaha pagpasalig sa slot o prayoridad sa vaccination batok Coronavirus Disease 2019 (COVID-19), tungod sa mga reports nga adunay mga nagpailang indibidwal nga taga Bureau of Internal Revenue (BIR) ug naga balay-balay sa pagpangolekta og kwarta alang sa bakuna, apan giklaro ni Mayor Sara nga kini pagpangilad ug walay ingon ani nga sistema ang gobyerno.
“Warning lang sa tanan natong kaigsoonang Dabawenyo nga kung adunay mga ingon ani nga panghitabo, dili na siya tinuod. So, do not give money to anybody para sa inyuhang pagpabakuna,” sulti sa mayor.
Matud sa alkalde, ang bugtong pamaagi aron mabakunahan mao ang pag-sign up aron maapil sa listahan ug magpaabot sa schedule nga ihatag alang sa pagbakuna.
Gidugang ni Duterte-Carpio, kung aduna may mga insidente o makonsiderang vaccine scammers, gilayon kining i-report sa pinakaduol nga presinto sa kapulisan aron kini maaksyonan.
RadyoMaN Kirby Manzon
