Davao City – Walay problema ang pagpahigayon og lockdown sa usa ka opisina o establisemento ugaling ubay-ubay na ka mga indibidwal, ang magpositibo sa Coronavirus Disease 2019 (COVID-19).
Gibutyag ni Davao City Mayor Sara Duterte (sa interbyu sa city-owned radio), mamahimong makapahigayon og personal o internal lockdown ang usa ka opisina ilabina kung aduna nay lima (5) ka tawo o kapin nga magpositibo sa COVID-19.
Segun ni Mayor Sara, mas maayo kini nga aksyon aron maprotektahan ang uban pang empleyado ug makahimo og alternatibong pamaagi o sistema sa trabahoan aron padayon gihapon ang operasyon niini bisan og naka-lockdown.
“Pwede ba mag-lockdown mo on your own kung duna nay 5 or more positive (COVID-19 cases)? Yes, pwede kaayo. Mas maayo gani for the protection of the employees kung on their own, the managers will decide on a lockdown and send everyone to work from home or send everyone to field offices,” tataw sa alkalde.
Gidugang ni Duterte-Carpio, kung adunay mga opisina nga magdumili pagpatuman sa lockdown luyo sa mga kaso sa COVID-19, mamahimo kining i-report sa district health office aron masayran ang tinuod nga sitwasyon ug aron ma-assess kung kinahanglan ba nga ipailawom sa lockdown.
RadyoMaN Kirby Manzon
